មនុស្ស​យ៉ាងតិច៩នាក់ បានស្លាប់ និង៧នាក់ទៀត​ រងរបួសធ្ងន់ បន្ទាប់ពីអគ្គិភ័យឆេះសណ្ឋាគារ​​មួយកន្លែង នៅឥណ្ឌា

February 12, 2019 4

ញូដេលី ៖ សារព័ត៌មាន Hindustan Times នៅព្រឹក​ថ្ងៃអង្គារ ទី១២ ខែកុម្ភៈ ឆ្នាំ២០១៩ បានចេញផ្សាយថា មនុស្ស​យ៉ាងតិច៩នាក់ បានស្លាប់ និងប្រមាណ៧នាក់ទៀត​ រងរបួសធ្ងន់ បន្ទាប់ពីគ្រោះ​អគ្គិភ័យ​បានកើតមាន​ឡើងនៅសណ្ឋាគារ​​មួយកន្លែង ក្នុងរដ្ឋធានីញូដេលី​ នាថ្ងៃអង្គារនេះ។

ប្រធានទីភ្នាក់ងារ​ពន្លត់អគ្គិភ័យនៅ​ក្នុង​តំបន់ លោក ស៊ូនីល ឈួដារី (Sunil Choudhary) បានឲ្យដឹងថា មនុស្ស​០៩នាក់បានស្លាប់ នៅក្នុងហេតុ​ការណ៍​ភ្លើងឆេះនៅសណ្ឋាគារ អាភីត ផាឡេស (Arpit Palace) ក្នុងសង្កាត់ ខារ៉ូល បេក (Karol Bagh)។ ខណៈនេះ អគ្គិភ័យក៏ត្រូវ​បានពន្លត់​ឲ្យរលត់​ហើយ​ដែរ។ លោក Choudhary បាន​បញ្ជាក់ទៀតថា មនុស្ស ២៥នាក់ត្រូវបាន​ជម្លៀសចេញពី​សណ្ឋាគារលំដាប់ផ្កាយ​បីនេះ រីឯ​២​នាក់​​បានលោត​ចុះមកក្រោម ដោយសារ​ការភ័យ​ស្លន់ស្លោពេក។

គួរជម្រាបថា មូលហេតុនៅ​ពីក្រោយគ្រោះអគ្គិភ័យខាង​លើ មិនទាន់ត្រូវបានបញ្ជាក់ ឬកំណត់ច្បាស់​នៅឡើយទេ ប៉ុន្តែមាន​​ការ​សង្ស័យថា វាអាចបង្កឡើង​ដោយ​ការឆ្លង​ចរន្តអគ្គិសនី៕

Loading...