អភិបាលខេត្តកំពត៖ ការដោះស្រាយពីបញ្ហាទំនាស់ដីធ្លីជូនពលរដ្ឋ គឺជាគោលនយោបាយឆន្ទៈរបស់សម្ដេចតេជោ ហ៊ុន សែន

December 08, 2018 154

កំពត ៖ លោក ជាវ តាយ អភិបាលខេត្តកំពត បានលើកឡើងថា ការដោះស្រាយពីបញ្ហាទំនាស់ដីធ្លីជូនប្រជាពលរដ្ឋ គឺជាគោលនយោបាយឆន្ទៈរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ដែលលោកតែងតែបានក្រើនរំលឹកណែនាំជំរុញដល់អាជ្ញាធរ​មានសមត្ថកិច្ច នៅក្នុងមូលដ្ឋានជាប្រចាំ គឺធ្វើយ៉ាងណាឲ្យមានការយកចិត្តទុកដាក់ដោះស្រាយជូនប្រជាពលរដ្ឋ ដោយមិនត្រូវទុកបញ្ហាបង្កការលំបាកដល់ប្រជាពលរដ្ឋយូរអង្វែងឡើយ។

លោកលើកឡើងបែបនេះ នៅថ្ងៃទី៧ ខែធ្នូ ឆ្នាំ២០១៨ ក្នុងកិច្ចប្រជុំគណៈកម្មាធិការគ្រប់គ្រងដីរដ្ឋថ្នាក់ខេត្ត ដោយមានសមាសភាពចូលរួមពីថ្នាក់ដឹកនាំ នៃមន្ទីរ អង្គភាព និងអាជ្ញាធរស្រុក ឃុំពាក់ព័ន្ធប្រមាណ៥៨រូប។

លោកបន្តថា “បញ្ហាទំនាស់ដីធ្លីរវាងប្រជាពលរដ្ឋ និងប្រជាពលរដ្ឋរវាងក្រុមហ៊ុន និងរវាងអង្គភាពកងកម្លាំងទ័ពនៅតំបន់មួយចំនួន ក្នុងខេត្តកំពត មានការអូសបន្លាយយូរឆ្នាំ នៅដោះស្រាយមិនទាន់បានបញ្ចប់ ដែលបញ្ហាទាំងអស់នោះ សម្រាប់តម្រូវឲ្យអង្គប្រជុំនៅពេលនេះ រួមគ្នាពិនិត្យពិភាក្សាដោយធ្វើយ៉ាងណា បង្រួមបញ្ហាពីច្រើនមកតិចនិងពីតិចមកបញ្ចប់អស់បញ្ហា ដើម្បីជួយសម្រួលឲ្យប្រជាពលរដ្ឋទទួលបានការកក់ក្ដៅមានកម្មសិទ្ធិកាន់កាប់ដីធ្លីស្របច្បាប់ ក្នុងការងារបង្កបង្កើនផលសម្រាប់ជីវភាពរស់នៅប្រចាំថ្ងៃ បានកាន់តែល្អប្រសើរឡើង”។

លោកអភិបាលបញ្ជាក់ទៀតថា “ដូចនេះកិច្ចប្រជុំនាពេលនេះ គឺយើងទាំងអស់គ្នាដែលជាអ្នកពាក់ព័ន្ធ ត្រូវរួមគ្នារកឫសគល់ នៃបញ្ហាឲ្យបានថាតើបញ្ហាទាំងនោះកើតចេញដោយសារអ្វី ដើម្បីឈានបញ្ចប់ឲ្យសម្រេចជោគជ័យ ហើយរាល់ការអនុវត្ត គឺត្រូវតែអនុវត្តទៅតាមនីតិវិធីកុំទុកឲ្យបញ្ហានៅតែបន្តមិនចប់ យើងត្រូវដោះស្រាយដោយគោលការណ៍តម្លាភាព និងឈរលើយុទ្ធសាស្ត្រឈ្នះៗទាំងអស់គ្នាជាការចាំបាច់”៕

Loading...