នៅចុងឆ្នាំ២០១៩នេះ កម្ពុជា នឹងទទួលបានដំណក់ប្រេងជាលើកដំបូង, សម្ដេចតេជោ ថា លុយដែលបានពីការបូមប្រេង មិនយកមកប្រើក្នុងចំណាយចរន្តឡើយ

September 11, 2019 59

ភ្នំពេញ ៖ ស្របពេលដែលកម្ពុជា នឹងទទួលបាននូវដំណក់ប្រេងជាលើកដំបូង នៅចុងឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានលើកឡើងថា លុយដែលបានពីប្រេងនេះ មិនយកមកប្រើក្នុងចំណាយចរន្តឡើយ តែគឺសម្រាប់ ហេដ្ឋារចនាសម្ព័ន្ធ និងអភិវឌ្ឍន៍ជាតិ។

លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានដកស្រង់ប្រសាសន៍របស់សម្ដេចតេជោ ហ៊ុន សែន ក្នុងកិច្ចប្រជុំពេញអង្គគណៈរដ្ឋមន្ត្រី មកបង្ហោះលើបណ្ដាញទំនាក់ទំនងសង្គមហ្វេសប៊ុកថា “នៅពេលដែលយើងមានប្រេង លុយដែលបានពីប្រេងនេះ មិនយកមកប្រើក្នុងចំណាយចរន្តឡើយ តែគឺសម្រាប់ហេដ្ឋារចនាសម្ព័ន្ធបម្រើអភិវឌ្ឍន៍ជាតិ”។

អគ្គនាយកប្រេងកាត នៃក្រសួងរ៉ែ និងថាមពល លោក ជៀប សួរ បានថ្លែងបញ្ជាក់ថា នៅចុងឆ្នាំ២០១៩ខាងមុខនេះ កម្ពុជានឹងទទួលបាននូវដំណក់ប្រេងជាលើកដំបូង ហើយនឹងផលិតជាលក្ខណៈពាណិជ្ជកម្ម នៅឆ្នាំ២០២០ផងដែរ ខណៈជាមធ្យមក្នុងមួយថ្ងៃ អាចផលិតបានប្រមាណ ៧ពាន់ប៉ារ៉ែល។

សូមរំលឹកថា ក្រុមហ៊ុន Chevron បានបង្កើតកិច្ចព្រមព្រៀងប្រេងកាតប្លុក A របស់កម្ពុជា នៅឆ្នាំ២០០២ ហើយនៅឆ្នាំ២០១៦ ក្រុមហ៊ុន Kris Energy បានទិញភាគហ៊ុនទាំងអស់ពីក្រុមហ៊ុន Chevron លើគម្រោងរុករកប្រេងក្នុងប្លុក A នេះ។ បច្ចុប្បន្ន ក្រុមហ៊ុន Kris Energy មានភាគហ៊ុន៩៥% និងរាជរដ្ឋាភិបាលកម្ពុជា មានហ៊ុន៥ភាគរយ៕

Loading...